Ismaili “godet” me akuza Kurtin për qasjen ndaj presidentit Thaçi

Deputeti i PDK-së, Uran Ismaili, e ka kritikuar kryetarin e VV-së, Albin Kurti, për qasjen e tij ndaj presidentit Hashim Thaçi, raporton Gazeta Evropa.

Ismaili ka thënë se Albin Kurti nuk brengoset për vlerat e luftës përderisa i duket se Gjykata Speciale i bën favore politike, duke shpresuar se ajo ia eliminon kundërshtarët.

“Prandaj, sulmon edhe kur nuk sulmohet”, ka shkruar Ismaili në llogarinë e tij në “Facebook”.

Postimi i plotë:

“Shko në Hagë, Hashim” – këtë fjali e ka shkruar kohë më parë Albin Kurti dhe duhet të jetë një prej më të turpshmeve të tij, i cili, kur e ka thënë, i verbuar nga urrejtja politike, nuk e ka kuptuar se në Hagë do të mund të gjykohej Hashimi i UÇK-së, e jo Hashimi i politikës. Jo kundërshtari i Albinit, por armiku i Serbisë. Ose, ndoshta edhe e ka ditur, por ka dëshiruar ta krijojë një të vërtetë tjetër, të tij, por që nuk është e vërteta e Kosovës.

Dje, Albin Kurti e sulmoi sërish Hashim Thaçin, edhe pse ai udhëtoi në Hagë për të kaluarën e tij si ushtar i lirisë.

Sot, u raportua se Serbia ka dërguar në Hagë mijëra dokumente për Hashim Thaçin dhe veprimtarinë e tij kundër Serbisë.

Albin Kurti nuk brengoset për vlerat e luftës përderisa i duket se Gjykata Speciale i bën favore politike, duke shpresuar se ajo ia eliminon kundërshtarët. Prandaj, sulmon edhe kur nuk sulmohet.

Albin Kurti është modeli i politikanit, që e gjejmë nëpër histori, që çdo herë kur ka pasur nevojë për unitet – ky model i politikanit ka vepruar për përçarje. Kjo është fatkeqësi kombëtare që na ka përcjellë në etapa të ndryshme të historisë, e është fatkeqësi që edhe sot e kemi një politikan të tillë.

Kjo është përballje e Kosovës me Serbinë, e historisë së Kosovës me fabrikimet e Serbisë. Të gjithë e dimë se UÇK dhe populli i Kosovës kanë qenë të rreshtuar në anën e drejtë. Dëbimi i shqiptarëve, krimet, gjenocidi kanë ndodhur nga Serbia. Nuk ka Gjykatë, e as politikan, që mund ta ndryshojë këtë histori.

Comments are closed.