Rehatimi në ambasada: MPJ’ja pritet ta dërgojë në Suedi, ish-këshilltarin e ministrave të AKR’së

Njeriu i afërt i ministrit të Jashtëm në detyrë, Behgjet Pacolli, është rrugës për t’u bërë konsull i Kosovës në Suedi.

Sheqir Kutllovci është propozuar për konsull në shtetin skandinav, i cili në shumë aktivitete partiake është parë bashkë me Pacollin e figura të tjera të AKR-së.

Në fakt, Kutllovci për periudha të ndryshme ka shërbyer si këshilltar i ish-ministrit të Brendshëm, Bejtush Gashi, dhe këshilltar i ish-ministres së Mjedisit, Albena Reshitaj.
Kutllovci ka konfirmuar për KTV-në se është propozuar për konsull, por që nuk ka dhënë detaje të tjera.

“I nderuar, jam i propozuar më herët për konsull në Suedi. Për informata të tjera mund të drejtoheni në MPJ”, ka thënë Kutllovci.
Derisa, në Ministrinë e Punëve të Jashtme, kanë thënë se nuk ka për momentin vendim që e emëron Kutllovcin konsull.

“Në Ministrinë e Punëve të Jashtme nuk është marrë asnjë vendim, dhe si rrjedhojë, nuk është ndjekur asnjë procedurë për emërimin Konsull të z.Sheqir Kutllovci”, ka thënë Zyra për Media e MPJ-së

Përgjigje të ngjashme ka dhënë edhe sekretari i Përgjithshëm i Ministrisë së Jashtme, Fitim Sadiku.

“Ne nuk kemi pranuar kurrfarë vendimi nga Zyra e Ministrit për emërimin e z. Kutllovci për konsull. Vendimet që merren nga ministri, përcillen te sekretari i Përgjithshëm për ekzekutim”, ka thënë Fitim Sadiku.

Comments are closed.